LDK kërkon shpjegim shtesë rreth vendimit që Bllaca të mbrohet me burg shtëpiak

nga elbasi.. Wed Dec 02, 2009 8:53 am

Nënkryetari i LDK-së Lutfi Haziri ka kërkuar nga organet e gjyqësisë që të japin shpjegime shtesë rreth vendimit që Nazim Bllaca të mbrohet me burg shtëpiak. “ Për ne është ë pa kuptueshme që një njeri që vetë-pohon se ka bërë vrasje dhe vepra të tjera të dhunshme, të mbrohet në shtëpi, kjo kërkon shpjegim”, ka thënë Haziri

Nënkryetari i Lidhjes Demokratike të Kosovës Lutfi Haziri, ka deklaruar se Policia e Kosovës duhet të hetojë të gjitha dëshmitë, për të zbardhur rastet që lidhen me krime, ndërsa vendimin për caktimin e masës së arrestit shtëpiak prej 30 ditësh për Nazim Bllacën e ka quajtur të pakuptimtë, pasi që njeriu i cili deklarohet publikisht se ka marrë pjesë në krime, t’i shpallet masa e arrestit shtëpiak.

Sipas Hazirit është e dëshmuar se në Kosovë vetë gjyqësia ka shkaktuar vetëm dhimbje, ndërsa ka shtuar se askush nuk ka të drejtë përveç organeve të drejtësisë të vlerësojë se kush është patriot e kush tradhtar, derisa SHIK-un e ka cilësuar si organizatë ilegale.

Haziri nuk ka dashur të flasë nëse kjo mund të ndikojë në partneritetin e koalicionit me PDK-në, me që anëtarë të kësaj partie kanë qenë pjesëtarë të SHIK-ut. Por ka shtuar se koalicioni LDK - PDK ka qenë koalicioni kuq e zi për 17 shkurtin, e që është evoluar në “Guns and Roses”, në kuptim të paqes, por nuk ka komentuar nëse është koalicion i detyrueshëm.

LDK ka përshëndetur prezantimin e djeshëm të Kosovës nga ministri Hyseni, siç ka thënë, duke dëshmuar që pavarësia e Kosovës është zgjidhje e qëndrueshme.