Shtetet paraqesin qëndrimet për pavarësinë e Kosovës

nga elbasi.. Wed Dec 02, 2009 8:58 am

Në Gjykatën Ndërkombëtare të Drejtësisë ka vazhduar seanca dëgjimore për ligjshmërinë e shpalljes së pavarësisë së Kosovës. Shqipëria, Gjermania dhe Arabia Saudite kanë mbrojtur pavarësinë e Kosovës dhe vullnetin politik të popullit të saj. Argjentina e ka kundërshtuar atë, duke e cilësuar si shkelje të tërësisë territoriale të Serbisë.

Ambasadori i Shqipërisë në Holandë, Gazmend Barbullushi, në paraqitjen e argumenteve në Gjykatën Ndërkommbëtare të Drejtësisë, tha se vendi i tij e cilëson shpalljen e pavarësisë së Kosovës, në përputhje me të drejtën ndërkombëtare.

Barbullushi tha se Shqipëria do të vazhdojë të ofrojë mbështetjen e saj të plotë për popullin e Kosovës në përpjekjet e tij për paqen dhe përparimin për të gjithë qytetarët e saj. Ai në fjalën e tij ka përmendur dhunën sistematike të Serbisë mbi popullin e Kosovës, që nga heqja me dhunë e autonomisë se Kosovës në vitin 1989.

Përfaqësuesi i Shqipërisë tha se Kosova dhe populli i saj gjatë viteve të 90 ta, e posaçërisht dhjetë vjet më parë, iu nënshtrua një spastrimi më të madh etnik që pas Luftës së Dytë Botërore dhe vendi i tij, tha ai, ka pranuar atëherë mbi 700 mijë qytetarë të Kosovës, njofton BBC.

Barbullushi gjithashtu tha se Kosova sot është një shtet i pavarur dhe shumëkombësh i përcaktuar për demokracinë dhe rendin dhe ligjin, me mbrojtjen e plotë për të drejtat e të gjithë qytetarëve të saj. "Përkushtimi i Kosovës për të mbrojtur të drejtat e njeriut, dhe të pakicave në veçanti, është një shembull për të gjitha vendet e tjera në botë.

Me qëndrimin dhe sjelljen e saj të matur, Kosova kontribuon për paqen dhe qëndrueshmërinë në Ballkan. Ky është një fakt i pranuar përgjithësisht", tha ambasadori i Shqipërisë në Holandë.

Ndërkaq përfaqësuesit e Gjermanisë thanë se shpallja e pavarësisë së Kosovës është bërë në përputhje me të drejtën ndërkombëtare dhe ajo ka forcuar paqen dhe qëndrueshmërinë në rajon.

Këshilltarja ligjore e Ministrisë së Jashtme gjermane, Sussane Wasum Rainer, tha se statusi i Kosovës është rrjedhojë e të drejtës së popullit të Kosovës në vetëvendosje dhe se "ata që punuan për shpalljen e pavarësisë dhe e nënshkruan atë, kanë punuar në emër të popullit të Kosovës dhe jo në emër të institucioneve që janë krijuar nga autoritetet ndërkombëtare".

Oratori i radhës ka qenë ambasadori i Arabisë Saudite në Holandë, Abdullah Al -Shagrud.

Ai ka thënë se duke njohur pavarësinë e Kosovës, Arabia Saudite ka respektuar vullnetin politik të popullit të Kosovës për të qenë i pavarur, duke i kontribuar stabilitetit në rajon.

Përfaqësuesi i Arabisë Saudite ka ftuar GJND-në që të ketë parasysh faktin se pavarësia e Kosovës i ka kontribuar stabilitetit të vendit dhe të rajonit.

Në seancën e sotme, ishte vetëm Argjentina ajo që e ka kundërshtuar shpalljen e pavarësisë. Përfaqësuesja e saj, Suzana Ruiz Çeruti, e ka cilësuar deklaratën e pavarësisë në kundërshtim me Rezolutën 1244 të Këshillit të Sigurimit.

Argumentimin e saj ajo e ka bazuar në, siç ka thënë, faktin se “shpallja e pavarësisë së Kosovës nuk është në harmoni me Rezolutën 1244, sepse kështu është ndërprerë procesi politik që do të sillte deri tek marrëveshja ndërmjet dy palëve, si zgjidhje e vetme e mundshme dhe e pranueshme”.

Zonja Çeruti ka pohuar se “dokumenti nga Ramubeja nuk parasheh të drejtën e pavarësimit të Kosovës”.

Përfaqësuesja e Argjentinës ka shtuar se “shkelja e të drejtave të njeriut nuk justifikon të drejtën e shkëputjes së një vendi, por vetëm rikthimin e këtyre të drejtave të shkelura”. Për dallim nga folësit tjerë, ajo ka thënë se është pikërisht GJND-ja ajo që është kompetente të vendosë për këtë çështje.

”Pavarësia e Kosovës ka shkelur parimin e integritetit territorial dhe nuk është në harmoni me të drejtën e popujve për vetëvendosje”, ka konkluduar përfaqësuesja e Argjentinës, Suzana Ruiz Çeruti.

Ndryshe, janë gjithsejt 28 shtete që kanë deponuar qëndrimet e tyre deri më tash, për dhe kundër deklaratës së pavarësisë. Të enjten, në seancën dëgjimore do të paraqitet fillimisht Austria, pastaj Azerbeixhani, Bahreini dhe Bellorusia.