KEK-u thotë të jetë përgatitur për dimër – qytetarët nuk besojnë

nga elbasi.. Thu Dec 03, 2009 8:23 am

Gjendja energjetike do të mbetet stabile gjatë festave të fundviti dhe gjatë dimrit, kanë premtuar sot zyrtarë të KEK-ut të cilët kanë shtuar se janë të përgatitur për sezonin e dimrit. Ndërsa qytetarët nuk besojnë në këto deklarime, aq më parë për shkak të ndërprerjeve të shpeshta këtyre ditëve

Gjatë këtij muaji dhe gjatë dimrit do të ketë qëndrueshmëri energjetike në Kosovës dhe këtë së paku e kanë premtuar zyrtarë të KEK-ut, të cilët mungesën e energjisë elektrike në disa lokalitete e kanë arsyetuar me riparime që kanë ndodhur në rrjet nga KOST-i dhe KEK-u.

Viktor Buzhala, zëdhënës i KEK-ut, ka thënë se KEK-u është duke treguar një përformancë të mirë në prodhim tash e sa muaj.

Sipas Buzhalës deri tani KEK-u ka përballuar me sukses kërkesën për energji elektrike, por ai kërkon edhe nga qytetarët që të kursejnë rrymën në mënyrë që të kontribuojnë në stabilizim të furnizimit.

Ndërsa, në anën tjetër, qytetarët edhe pse vërejnë përmirësim në furnizimin me energji, ata nuk ndihen të sigurt se ky furnizim të jetë i qëndrueshëm gjatë tërë dimrit.

Deri tani temperaturat nuk kanë qenë aq të ulëta për t’u ngritur edhe kërkesa për më shumë energji elektrike, por me ndryshimin e temperaturave që pritet të ndodhin KEK-u shprehet i gatshëm t’iu ofrojë sasi të mjaftueshme të energjisë elektrike qytetarëve të Kosovës, përkundër skepticizmit të tyre të theksuar.