Brown për rritjen e objektivave për klimën

Kryeministri britanik, Gordon Brown, thotë se dëshiron që udhëheqësit evropianë të angazhohen për reduktim edhe më të madh të emetimeve sesa ishte rënë dakord më parë.



Brown tha se Bashkimi Evropian duhet të synonte për të ulur emetimet me 30 për qind në vend të 20 për qind deri në vitin 2020.

Bashkimi Evropian deri tani ka treguar vullnetin për të rritur objektivat nëse arrihej një marrëveshje ndërkombëtare në samitin e Kopenhagës.

Reduktime në nivelin 30 për qind, është një propozim që mund të has me kundërshtimin e vendeve të Evropës Lindore, të cilat varen nga termocentralet që punojnë me qymyrguri.

Delegatët nga afro 200 vende diskutojnë gjatë samitit për Klimën që po zhvillohet në Kopenhagë për arritjen e një marrëveshjeje për t'u ballafaquar me ngrohjen globale.

Një vrojtim i komisionuar nga Shërbimi Botëror i BBC-së sugjeroi se po shtohet shqetësimi i publikut ndaj ngrohjes globale.

Rreth 64 për qind e të anketuarve thanë se e konsideronin atë një problem shumë serioz, shifër kjo 20 për qind më e lartë se e një dekade më parë.

Sipas vrojtimit, në dy nga vendet që shkaktojnë ndotjet më të mëdha, Shtetet e Bashkuara të Amerikës dhe Kinë, ka rënë shqetësimi për rreziqet e ndryshimit të klimës. /BBC/ Postuar: 10:33 / 8 Dhjetor 2009 | RSS

Gates: Do të fitojmë në Afganistan

Sekretari amerikan i Mbrojtjes, Robert Gates, ka shkuar në Afganistan, një javë pasi presidenti Obama vendosi të dërgojë atje 30 mijë trupa shtesë për luftuar talebanët. Gates tha se mesazhi i tij ishte që Shtetet e Bashkuara të Amerikës do të fitonin.



Gates do të zhvillojë bisedime me presidentin afgan, Hamid Karzai përpara se të takohet me ushtarët amerikanë. Gates tha se do të diskutonte se si të përdoren trupat shtesë në partneritet me forcat kombëtare afgane.

Gates tha se do të diskutonte edhe se si të stërviteshin më mirë trupat afgane për një tërheqje eventuale të amerikanëve. "Teksa përmirësohet situata e sigurisë dhe ne do të jemi në gjendje që në kohë të zvogëlojmë numrin e trupave, civilët, zhvillimi, ekonomia dhe të tjera lloj marrëdhëniesh mes nesh do të jenë predominante," e citon atë agjencia e lajmeve Reuters.

Presidenti Obama urdhëroi dërgimin e 30 mijë trupave shtesë në Afganistan sa më shpejt të jetë e mundur, duke e çuar numrin e përgjithshëm të trupave në vend në më shumë se 100 000. Aleatët e NATO-s në Afganistan kanë rënë dakord për të kontribuar me 7000 trupa së bashku.

Sekretari amerikan i Mbrojtjes pret që të bisedojë me udhëheqësin afgan edhe për kabinetin e ri që mund të njoftohet javën e ardhshme. /BBC/ Postuar: 10:33 / 8 Dhjetor 2009 | RSS

Paralajmërim ndaj helmeve në lodra

Instituti gjerman për vlerësimin e rreziqeve paralajmëron ndaj substancave që shkaktojnë kancerin në lodrat për fëmijë. Nevoja për veprim është urgjente, citojnë gazetat e grupit mediatik WAZ, nga një raport aktual i këtij instituti për qeverinë gjermane.



Sipas raportit, niveli i substancave të rrezikshme të gjetura në lodra, është në disa raste njëqind herë më i lartë se vlera e konsideruar e parrezikshme. Instituti tërheq vëmendjen në këtë kontekst për numrin në rritje të rasteve të kancerit tek fëmijët.

Direktiva në fuqi e BE-së për këtë problem është krejt e pamjaftueshme, vlerëson instituti gjerman për vlerësimin e rreziqeve. /DW/

Bisedime direkte mes SHBA-Koreja e Veriut

SHBA-ja fillon këtë të martë bisedime direkte me Korenë e Veriut mbi programin bërthamor të vendit komunist.



Për këtë arsye i dërguari i posaçëm i SHBA-së Stephen Bosworth mbërriti sot në Penjan. Objektivi është vënia sërish në lëvizje e negociatave.

Koreja e Veriut pas kritikave të Këshillit të Sigurimit për shkak të një testi bërthamor nëntokësor, doli në prill nga bisedimet gjashtëpalëshe. Pjesëmarrës në këto bisedime janë krahas dy Koreve, SHBA-ja, Japonia, Kina dhe Rusia. /DW/
Postuar: 10:30 / 8 Dhjetor 2009 | RSS

Irani shtyp me dhunë protestat në disa qytete të vendit

Irani ka shkaktuar kritika ndërkombëtare pasi forcat e sigurisë të atij vendi përdoren gaz lotsjellës dhe shkopinj kundër mijëra demonstruesve që pushtuan rrugët në protesta kundër qeverisë.



Shtetet e Bashkuara, Britania dhe grupi i të drejtave të njeriut, Amnesty International e dënuan shtypjen policore.

Mijëra studentë dhe protestues të tjerë organizuan demonstrata në Teheran dhe qytete të tjera të hënën. Disa prej protestuesve thërrisnin, vdekje diktatorit, duke ju referuar presidentit Ahmadinejad. Të tjerë dogjën portrete të udhëheqësit suprem iranian.

Dëshmitarët thonë se policia dhe milicia pro qeveritare patrulloi rrugët e Teheranit, duke rrahur demonstruesit me shkopinj dhe hedhur gaz lotsjellës.

Demonstruesit e transformuan tubimin e Ditës Studentore në protesta kundër rizgjedhjes së debatuar me 12 qershor të presidentit Ahmadinejad. Disa aktivistë opozitarë u arrestuan përfshi udhëheqësin studentor, Majid Tavakoli të universitetit të Teheranit, Amir Kabir. /VoA/
Postuar: 10:29 / 8 Dhjetor 2009 | RSS