Kosova dëshmoi pjekurinë e saj shtetërore

Kosova dëshmoi pjekurinë e saj shtetërore


Kryeministri
i Republikës së Kosovës, Hashim Thaçi, nëpërmjet një deklarate e ka
vlerësuar lartë pjesëmarrjen e qytetarëve në raundin e dytë të
zgjedhjeve lokale dhe mbarëvajtjen e procesit zgjedhor, i cili – sipas
tij – edhe në këtë raund ka arritur standardet më të larta demokratike.



Kryeministri Thaçi shpreh konsideratë për angazhimin e subjekteve
politikë në këtë garë elektorale, duke i uruar të gjithë kryetarët e
Komunave të Kosovës për mandatin e tyre të marrë nga vullneti i lirë i
qytetarëve të vendit.

“Mirënjohje dhe falënderime u drejtohen edhe vëzhguesve vendorë dhe
ndërkombëtarë, të cilët përmbushën detyrat e tyre me përgjegjësi të
plotë, duke ndihmuar që procesi zgjedhorë të kalojë në frymën e
transparencës së plotë”, thuhet në deklaratë.

Me këto zgjedhje, sipas Thaçit, Kosova ka kaluar suksesshëm provën e
funksionimit të demokracisë dhe përsëri ka dëshmuar pjekurinë e saj
shtetërore, duke u bërë shembull i demokracisë në rajon.

“Arritja e standardeve evropiane është meritë e të gjithë akterëvë të
përfshirë në këtë proces, por në veçanti e qytetarëve të Republikës së
Kosovës, të cilët me pjesëmarrjen e tyre, mundësuan zgjedhje të lira,
fer dhe demokratike”, përfundon deklarata.