FSK, garancë e së tashmes dhe e së ardhmes së vendit

FSK, garancë e së tashmes dhe e së ardhmes së vendit

Presidenti i Republikës së Kosovës, Fatmir Sejdiu, me rastin e festave të fundvitit, organizoi një pritje për kuadrin komandues të Forcës së Sigurisë së Kosovës, të prirë nga gjenerallejtënant Sylejman Selimi, komandant i FSK-së.



Në këtë pritje, në të cilën ishin të pranishëm edhe komandanti i KFOR-it, gjenerali Markus Betler, zëvendëskomandanti i KFOR-it, gjeneralmajor Antonio Satta, ministri i FSK-së, Fehmi Mujota, zëvendësministri Behxhet Brajshori, zëvendëskomandanti i FSK-së, gjeneralmajor Rrahman Rama, si dhe eprorë të tjerë të strukturës komanduese të FSK-së, presidenti Sejdiu tha se Forca e Sigurisë së Kosovës, gjatë vitit që po e lëmë pas, kanë bërë një punë të madhe në ecjen e tyre të ndërtimit si një mekanizëm i rëndësishëm i sigurisë së qytetarëve të vendit.

Duke e vlerësuar FSK-në si një mekanizëm të rëndësishëm për sigurinë e qytetarëve të vendit dhe një partner të rëndësishëm për paqen, sigurinë dhe stabilitetin në rajon, Presidenti Sejdiu tha se “ne do të lëvizim në standardet e NATO-s duke besuar shumë se Kosova, në një kohë të afërt, do të jetë anëtare e NATO-s”.

Sejdiu, i cili është edhe komandant suprem i FSK-së, tha se Forca e Sigurisë së Kosovës është një nga institucionet me peshë të veçantë, e cila i ka kapërcyer me sukses sprovat e para në karakterin multietnik të saj, në përgatitjet e mira profesionale dhe njerëzore.

“Ju keni dhënë shenjat më të mira se jeni një formacion i garancisë së mirë për të tashmen dhe të ardhmen e Kosovës, dhe si komandant suprem i FSK-së, ju premtoi juve, kuadrit komandues të FSK-së, gjithë mbështetjen e time, në çdo kohë, për zhvillimet e reja që do ketë FSK-ja”, theksoi presidenti.

Gjithashtu, Sejdiu i falënderoi edhe të gjithë pjesëtarët e NATO-s, të cilët në sfida të vështira përpiqen për të mbajtur, ruajtur dhe zhvilluar proceset e paqes dhe të stabilitetit të përgjithshëm.

Ndërsa, komandanti i KFOR-it, gjenerali Markus Bentler tha mënyra se si është shtruar rruga e ndërtimit të FSK-së është shumë e mirë dhe e mençur dhe u shërben qëllimeve dhe objektivave të komandantëve të FSK-së dhe të vetë Presidentit të vendit.

Gjatë pritjes, nga një fjalë rasti e mbajtën edhe Fehmi Mujota, ministër i Forcës së Sigurisë, si dhe gjenerallejtënant Sylejman Selimi, komandant i FSK-së.