Më shumë punë për liberalizimin e vizave

Raportuesja për Kosovën në Parlamentin Evropian, Ulrike
Lunacek, thotë se qytetarët e Kosovës nuk duhet të zhgënjehen, sepse në
një të ardhme jo të largët edhe ata do të mund të udhëtojnë pa viza për
në vendet e BE-së.



Kosova është vendi më i izoluar në Evropë. Qytetarët e Kosovës mund të
udhëtojnë pa viza vetëm në pesë shtete fqinjë të saj, ndërsa sa për
krahasim qytetarët e Afganistanit mund të udhëtojnë pa viza në 27
vende. Kështu thotë në një intervistë për Radion Deutsche Welle
raportuesja për Kosovën në Parlamentin Evropian, Ulrike Lunacek.

Ajo shprehet e zhgënjyer, se përse Kosova u la anash në procesin e
liberalizimit të vizave në kohën, kur vendet fqinjë të saj, Serbia,
Maqedonia dhe Mali i Zi nga data 19 dhjetor udhëtojnë lirshëm për në
vendet e BE-së.

“Nëse më pyet mua personalisht, unë do të dëshiroja që të gjitha vendet
e Ballkanit Perëndimor në paketë të përfshihen në procesin e
liberalizimit të vizave, sepse kjo ka të bëjë me njerëzit, nuk ka të
bëjë me shtetet. Por disa gjëra në politikë janë ndryshe dhe unë duhet
t'i pranoj, pavarësisht se nuk më pëlqejnë. Serbia, Maqedonia dhe Mali
i Zi, siç dihet nga data 19 udhëtojnë lirshëm në Bashkimin Evropian.
Bosnja e Hercegovina dhe Shqipëria mund të përfshihen në proces nga
gjysma e vitit të ardhshëm, edhe pse ato akoma duhet të përmbushin disa
kritere. Për Kosovën përfundimisht jam e lumtur, që Këshilli i Evropian
ka rekomanduar, që edhe me Kosovën duhet filluar dialogu për
përfshirjen e saj në procesin e liberalizimit të vizave, mirëpo se kur
do të ndodhë kjo, nuk e di”, tha Lunacek.

“Të gjithë e dimë se pesë shtete anëtare të BE-së nuk e kanë pranuar
pavarësinë e Kosovës dhe kjo është një problem në vete, që padyshim
reflekton në lënien anash të Kosovës nga liberalizimi i vizave. Mirëpo,
një gjë është e qartë, se pavarësisht kësaj qeveria e Kosovës nuk duhet
të ndalet, po duhet të bëjë më shumë në përmbushjen e kritereve, që
kërkohen për t'u përfshirë Kosova në procesin e liberalizimit të
vizave”, u shpreh ajo.

“Kjo do të marrë kohë, nuk mund ta them një datë të saktë, mirëpo këtu
mund të flasim për dy ose tre vjet, kjo do të thotë që qeveria e
Kosovës duhet ta bëjë punën e saj, ndërsa edhe Komisioni Evropian në
anën tjetër të punojë në këtë drejtim”, tha Lunacek.

Në Kosovë ka shumë zëra, që thonë se arsyeja, pse tri shtetet
ballkanike Kosova, Shqipëria dhe Bosnja e Hercegovina u lanë jashtë
procesit të liberalizimit të vizave, ka të bëjë me përkatësinë fetare,
ku shumica e popullatës në këto tri shtete janë muslimanë. Mirëpo, këto
kritika nuk janë të qëndrueshme, për Ulrike Lunacek.

“Kjo është një koincidencë, nuk është e qëllimshme, pse Kosova, Bosnja
e Hercegovina dhe Shqipëria u lanë anash për shkak të përkatësisë
fetare të popujve të tyre. Këto vende duhet të bëjnë atë, që bënë
shtetet fqinjë të tyre, që tashmë u përfshinë në procesin e
liberalizimit të vizave. Shembull: Bosnja e Hercegovina dhe Shqipëria
kanë përmbushur shumë kritere, shumë të tjera duhen përmbushur dhe në
mesin e vitit të ardhshëm ato mund të përfshihen në proces. Ndërsa për
Kosovën mund të them se nuk është përkatësia fetare e popullit të saj,
që ajo u la anash, por këtu në fund të fundit kemi të bëjmë edhe me
çështjen e statusit të saj, që për pesë shtete anëtare të BE-së, akoma
nuk është i zgjidhur”, tha raportuesja Lunacek.