KQZ kërkon sqarime shtesë nga KZAP

nga *lissa* Mon Dec 21, 2009 10:42 am

Me 7 vota pro, 2 kundër dhe 2 abstenime, Komisioni
Qendror i Zgjedhjeve ka vendosur qe t’i kërkojë Komisionit Zgjedhor për
Ankesa dhe Parashtresa një interpretim të vendimit të 18 dhjetorit, me
të cilin ky organ udhëzoi KQZ-në që të shpallë rivotim për komunën e
Prizrenit, Gjilanit dhe të Lipjanit.

Kryetarja e KQZ-së, Nesrin Lushta, tha se vendimi i anëtarëve të këtij
institucioni është marrë për shkak të, siç tha ajo, paqartësive në
lidhje me vendimin e KZAP-it.

“Vendimi që e morri sot Komisioni Qendror i Zgjedhjeve është jo që
KZAP-i të ndryshojë këtë vendim-aspak, mirëpo vetëm të japë një sqarim
përse në diapozitivin e vendimit të vet e ka përdorur terminin
‘udhëzohet’ Komisioni Qendror i Zgjedhjeve”, tha Lushta.

Komisioni Zgjedhor për Ankesa dhe Parashtresa udhëzoi të shtunën KQZ-në
që të marrë vendim për rivotim në 3 komunat ku, siç thuhet, janë
evidentuar parregullsi të shumta gjatë rrethit të dytë të zgjedhjeve
lokale të mbajtura më 13 dhjetor.

Këmbëngulës për të kërkuar sqarime kanë qenë anëtarët e PDK-së në KQZ.
Xhelil Pajaziti tha se udhëzimi i KZAP-it nuk është i qartë dhe si i
tillë lë shumë hapësirë për interpretime nëse është, ose jo obligues.

Por këtë e ka kundërshtuar Florian Dushi, anëtar i LDK-së në KQZ, që sipas tij e gjithë situata është e qartë.