Prifti fiton 100.000 dollarë në bixhoz


Lojërat
e fatit nuk janë veprimtari të cilën kisha ua rekomandon besimtarëve të
saj, megjithatë, një prift nga Karolina e Jugut ka arritur të fitojë
një shumë goxha të majme parash duke luajtur poker.






Pasi për
pak nuk kishte arritur të fitonte preminë kryesore prej 1 milion
dollarësh, prifti Andrew Trapp prapë se prapë nuk kishte dalë duarbosh
nga turneu i pokerit, pasi ka fituar 100 mijë dollarë.

Sidoqoftë, prifti ka vendosur të tregohet zemërgjerë dhe shumën e
fituar në bixhoz ka vendosur të dhurojë për qëllime humanitare,
respektivisht për ndërtimin e kishës së re.

Trapp ka thënë se është lajmëruar në këtë turnir për të ndihmuar
ndërtimin e kishës St.Michael, ndërtimi i së cilës pritet të kushtojë
5.5 milionë dollarë. /

I theruri kërkon të pijë kafe


Një kamerier i
një lokali në Michigan, ka mbetur i shokuar kur në restorant kishte
hyrë një person i therur me thikë në gjoks, i cili kishte kërkuar kafe.




52-vjeçari
kishte refuzuar t’u jepte paratë një grupi të plaçkitësve, të cilët e
kishin ndalur në rrugë, dhe si “shpërblim” për kokëfortësinë e tij, ata
ia kishin ngulur thikën në gjoks.

Personi anonim e kishte thirrur ndihmën e shpejtë dhe kishte shkruar në
restorantin e afërt për të porositur një kafe, natyrisht derisa të
vinte ndihma.

“Ishte sikur në film. Të gjithë mysafirët ishin të frikësuar. Ai
porositi kafen dhe shumë i qetë priste ardhjen e ndihmës së shpejtë”,
ka thënë kamerieri i restorantit Warren.

Gjyshja blen dhurata për 200 familjarë të saj


Gjyshja
nga Britania, Edith Abbey ka 90 vjet, mirëpo është ende vitale për të
blerë dhurata për Krishtlindje për rreth 200 anëtarët e familjes së saj.





Kjo
pensioniste nga Yorkshire ka 14 fëmijë, 85 nipa e mbesa, 40 stërnipa e
stërmbesa dhe 20 stër-stër-nipa e mbesa – dhe rregullisht blen dhurata
për të gjithë ata dhe disa familjarë të tjerë të afërt.

Përkundër faktit se ndodhet në karrocën e invalidëve, Edith e lumtur
pret festat – ndërsa falë ndihmës së të bijës së saj Kathy Cooper, ajo
viziton qendrat tregtare dhe blen dhuratat për familjarët e saj.

Përcillni lëvizjet e Babadimrit...


Organizata
NORAD ofron një mundësi të mirë, që nëpërmjet ueb-faqes google të mund
të përcillni lëvizjet e Babadimrit rreth planetit tonë.



Organizata
ajrore NORAD (North American Aerospace Defense Command) është krijuar
nga SHBA-të dhe Kanadaja, dhe përcjellë me vëmendje se çfarë ndodhë në
rrugët ajrore.

Kështu, NORAD pohon se tashmë njerëzit mund të përcjellin lëvizjet e
Babadimrit, i cili ecën nëpër kodra e male për t’i sjellë dhuratat në
shtëpitë e njerëzve.

Se për çfarë bëhet fjalë mund të kuptoni nëse vizitoni këtë ueb-faqe të
internetit. Organizata ajrore NORAD (North American Aerospace Defense
Command) është krijuar nga SHBA-të dhe Kanadaja, dhe përcjellë me
vëmendje se çfarë ndodhë në rrugët ajrore.

Kështu, NORAD pohon se tashmë njerëzit mund të përcjellin lëvizjet e
Babadimrit, i cili ecën nëpër kodra e male për t’i sjellë dhuratat në
shtëpitë e njerëzve.

Se për çfarë bëhet fjalë mund të kuptoni nëse vizitoni këtë ueb-faqe të internetit.

I dehuri vjedh aeroplanin


Kemi shkruar mjaft
herë për këmbësorë të dehur, vozitës të dehur, e për shumë ngjarje të
tjera që lidhen me të dehurit. Por, tash është radha për një pilot të
dehur.





Në një avio-miting, një person i dehur tapë, ka
vjedhur një aeroplan me shpejtësi dhe ka kënaqur sytë e vizitorëve që
kanë qenë të pranishëm.

Personi në fjalë ka bërë akrobacione që do të mbahen mend gjatë –
ndërsa mund të thuhet se i ka tejkaluar edhe pilotët që ishin esëll.

Përzgjidhen reklamat më irrituese në vitin 2009


Një
reklamë e punuar për ueb-faqen GoCompare, ku shihet një këngëtar i
operës, është shpallur reklama më irrituese në vitin 2009.





Pas
reklamës të kësaj ueb-faqeje, që merret me krahasimin e çmimeve të
sigurisë në Britani të Madhe, është radhitur reklama e firmës
Cash4Gold, e cila përpiqet t’i bindë vizitorët e saj të shesin arin e
tyre nëpërmjet internetit.
Reklama për preparatet aromatike Glade Touch ‘n’ Fresh – ku një
djalosh tenton ta bindë nënën e tij ta lejojë të kryejë nevojën në
tualetin e Paulit, është pozicionuar në vendin e tretë.

Kjo listë është sajuar nga lexuesit dhe redaktorët e revistës
Marketing, të cilët kanë bërë përzgjedhjen e reklamave më irrituese
gjatë vitit të kaluar.
Duket se këta lexues dhe redaktorë – nuk janë ndeshur me reklamat që
bëhen në Kosovë, ngase pa dyshim do të na i kishin rezervuar disa vende
në këtë top-listë.

Policia gjermane “arreston” një dhi


Një dhi, të shtunën, ka shkaktuar kaos të vërtetë në një udhëkryq në qytetin Bremen të Gjermanisë.



Dhia
kishte arritur të bllokonte qarkullimin e një mori veturave, ndërsa në
ndjekje të saj ishin vënë madje pesë vetura të policisë.
Derisa policët ishin vënë në ndjekje të dhisë, disa këmbësorë ishin
përpjekur ta mashtronin atë me bukë – mirëpo dhia ishte zhdukur në një
kaçubë të afërt.
Policia kishte rrethuar kaçubën, prej nga dhia ishte përpjekur të
ikte sërish – mirëpo dy policë “të zhdërvjellt”ë i janë hedhur sipër
dhe e kanë “arrestuar” atë.
Më pastaj, policia e ka marrë dhinë me vete, e ka mbyllur atë në një
qeli të burgut, ku edhe e kanë ushqyer. Policia tashmë është në kërkim
të pronarit të saj.

Spidermani” francez synon të ngjitet në Burj Khalifa


Francezi
Alain Robert, i cili njihet për shkathtësi të jashtëzakonshme alpike,
pasi deri më tash ka arritur të pushtojë ndërtesat më të larta në botë,
respektivisht të ngjitet në maje të tyre me pajisje të thjeshta, ka
vendosur të ngjitet edhe në ndërtesën më të lartë në botë, Burj Khalifa
në Dubai.




Siç bën të ditur gazeta Telegraph, Robert
planifikon që gjatë këtij viti të pushtojë ndërtesën e lartë 828 metra,
e cila është ndërtuar nga betoni, qelqi dhe çeliku.
“Më duhet ta bëj këtë gjë”, ka thënë ai. “Njoh disa njerëz në Dubai,
të cilët janë të interesuar të më shohin se si ngjitem në këtë
rrokaqiell”, ka shtuar Robert.

48-vjeçari Robert deri më tash ka pushtuar ndërtesat më të larta në
botë si, Empire State Building, Sears dhe Taipei 1010, ndërsa mendohet
se në Dubai do të mund t’i pengojë nxehtësia e madhe që zotëron në këtë
qytet.

Skocezët pinë 46 litra vodkë


Personat e rritur
në Skoci brenda vitit pinë sasi të alkoolit, që është e barabartë me 46
litra të vodkës, bën të ditur një studim të cilin e transmeton BBC.



Studimi
është bërë me kërkesë të Ministrisë së Shëndetësisë të Skocisë, ndërsa
përfshin periudhën shtator 2008 – shtator 2009, ku respodentët ishin
personat në moshë mbi 18-vjeç.
Sipas një përllogaritjeje, bëhet e ditur se një person i rritur në
Skoci brenda vitit ka blerë rreth 12.2 litra të alkoolit të pastër – që
sipas Ministrisë është i barabartë me 130 shishe venë për person.
Qeveria e Skocisë tashmë është duke u përpjekur të përcaktojë çmimin
më të ulët të alkoolit, dhe në këtë mënyrë të parandalojë konsumimin e
tepërt.

Nëna e papërgjegjshme


Rebecca Davey nga
Southendi i Britanisë së Madhe ka postuar në Facebook një fotografi ku
shihet djali i saj gjashtëmuajsh me cigare në gojë.



Miqtë e
nënës 18-vjeçare kanë mbetur të habitur kur kanë parë fotografinë dhe
pasi e kanë lajmëruar policinë, ata kanë shkuar në shtëpinë e saj për
ta kuptuar situatën.
Megjithatë, policia nuk ka arritur të gjejë asnjë shenjë që tregonte
se fëmija është në rrezik ose nëse nëna ishte e shqetësuar. Policët
kanë thirrur shërbimet sociale që të merren me këtë çështje.
“Problemi më i madh është se fëmijët lindin fëmijë. Mendojnë se
diçka e këtillë është argëtuese dhe interesante, por nuk e kanë idenë.
Edhe pse cigarja nuk ishte e ndezur, problemi është te mesazhi që
dërgon kjo fotografi. Kjo është vërtet papërgjegjësi dhe e
papranueshme”, citon The Sun, Michelle Elliot nga organizata Kidscape.
Nga ana tjetër, Rebecca dhe familja e saj kanë refuzuar të komentojnë këtë ngjarje.

Muri kinez nga çokollata


Një ekip i
pastiçierëve kinezë ka gatuar një kopje të Murit kinez nga çokollata.
Ky veprim i pazakonshëm, por i shijshëm, ka kënaqur shumë adhurues të
ëmbëlsirave.



Pastiçierët kanë shfrytëzuar edhe çokollatën e
bardhë për të ndërtuar këtë mur të ëmbël, mirëpo vetëm si ngjitës – që
të mos u prishet kryevepra e tyre prej çokollatës së zezë.
Kopja e Murit kinez, e gjatë 10 metra, është bërë një prej
atraksioneve kryesore turistike në ekspozitën e çokollatave që është
mbajtur në fillim të këtij muaji.
Në këtë ekspozitë janë shfaqur mbi 560 kopje të objekteve, të punuar nga çokollata.
Ndërkaq, i gjithë manifestimi organizohet për të tërhequr sa më shumë konsumatorë të çokollatës në Kinë.

Që 33 vjet ruan një top bore në frigorifer


Prena
Thomas nga Florida që 33 vjet në frigoriferin e saj ruan një top bore.
Ajo ishte befasuar shumë kur në vitin 1977 në këtë shtet të SHBA-ve
kishte rënë borë, andaj ka menduar se fotografitë nuk do t’i mjaftonin
si kujtim - dhe ka vendosur të ruajë edhe një “copë” të asaj bore.



Ajo
e ruan këtë top në frigoriferin e saj si suvenir. Ndërsa fakti se ky
top nuk është shkrirë asnjëherë, dëshmon për suksesin
elektro-energjetik të këtij vendi, ku rryma nuk është ndalur asnjëherë,
madje as në kohët e uraganeve.
Prena dhe bashkëshorti i saj Charles, në vitin 2003, janë
shpërngulur në një shtëpi tjetër, ku edhe e kanë marrë me vete topin e
borës.

Mbahet Olimpiada e dërgimit të mesazheve SMS


Qyteti
i New Yorkut ishte nikoqir i Olimpiadës për dërgimin e mesazheve SMS,
ku morën pjesë garuesit nga 13 shtete të ndryshme botërore.



Fituesi
i kupës botërore “LG Mobile” ishte ekipi nga Koreja e Jugut,
respektivisht tinejxherët Yeong Ho Bae, 18-vjeç, and Mok Min Ha,
17-vjeç, të cilët kanë arritur të shkruajnë tekstin prej 264
karakteresh për vetëm 1 minutë e 59 sekonda.
Fituesi është përcaktuar në bazë të shpejtësisë dhe saktësisë së
mesazheve, ndërsa ekipi fitues ka marrë shpërblimin prej 100.000
dollarëve.
Në mesin e pjesëmarrësve është edhe 16-vjeçarja nga Iowa, Kate
Moore, kampione e SHBA-ve për vitin 2009. Kjo vajzë dërgon rreth 12.000
porosi SMS brenda muajit. Ajo thotë se është në gjendje të bisedojë dhe
të shkruajë njëkohësisht, pa pasur nevojë të shikojë në telefon.
Morgan Dynda dhe Kate Moore nga SHBA-të fituan vendin e dytë në këtë
garë, respektivisht 20.000 dollarë, ndërsa Juan Ignacio Aufranc dhe
Agustina Montegna nga Argjentina u pozicionuan në vendin e tretë, dhe
fituan 10.000 dollarë.
Sponsor i këtij aktiviteti është kompania LG, e cila kishte angazhuar edhe disa dhjetëra përkthyes për këtë garë.

Zgjidhni problemet tuaja shoqërore në internet


Nëse
keni probleme me miqtë tuaj, familjarët, apo edhe partnerin – nuk është
nevoja më të fjaloseni. Në vend të ngatërresave të panevojshme – ju
mund t’i drejtoheni “juristëve” në InstantJury.com për të marrë vesh se
kush ka të drejtë.



Kjo ueb-faqe funksionon në stilin e një
gjykate shoqërore – ndërsa rastet janë të klasifikuara në 16 kategori,
si konteste familjare, fjalosje mes miqsh, politikat administrative,
kush është më i mirë etj.
Seancat mbahen falas, ndërsa për të hapur rastin tuaj fillimisht
duhet të regjistroheni. Më pastaj, në pika të shkurtra duhet ta
prezantoni rastin dhe ta propozoni dënimin për humbësin e kontestit të
hapur.
Pas kësaj, i akuzuari do ta pranojë një e-mail, i cili i bën thirrje të paraqitet para gjyqit dhe ta prezantojë dëshminë e tij.
Po ashtu nëse dëshironi të jeni pjesë e porotës, ju keni mundësi të konkurroni me një konkurrim të thjeshtë në këtë ueb-faqe.
Deri më tash në InstantJury.com janë zgjidhur një mori rastesh –
ndërsa nëse edhe ju keni telashe të tilla, lirisht mund t’i drejtoheni
kësaj ueb-faqeje.

Shitet shtëpia më e ngushtë në New York


Shtëpia
më e ngushtë në New York është shitur për 2.1 milionë dollarë. Objekti
i ulët, i punuar nga tullat e kuqe, me fasadë të gjerë vetëm 3 metra,
është ndërtuar në vitin 1873, në Grinch Village, në një hapësirë që
shfrytëzohej si shteg kalimi në mes të dy ndërtesave.

Shtëpia dykatëshe ka dy dhoma gjumi dhe dy banja, ndërsa për herë të
fundit ishte shitur në vitin 2000 për një shumë prej 1.6 milionë
dollarësh.
Në fasadën e shtëpisë ndodhet një mbishkrim, ku bëhet e ditur se aty
kishte jetuar dikur poetja Edna Sent Vinsent Milley dhe antropologia
Margaret Mid.

Një grua bllokohet 8 ditë në ashensor


Ka
mbijetuar për 8 ditë në një ashensor. Kjo është historia dramatike e
një 35 vjeçareje spanjolle në lokalitetin Sitges të Barcelonës.



Ajo
është nxjerrë nga forcat e policisë pasi kaloi plot 190 orë tmerri në
hapësirën e ngushtë të ashensorit dhe në errësirë të plotë. Ajo është
shtruar menjëherë në spitalin e Viladecans për t’u kuruar nga traumat.
Agjentet u lajmëruan nga familja pasi njerëzit e afërt nuk arritën
ta nxirrnin pas përpjekjeve që zgjaten disa ditë. Ashensori ishte
bllokuar mes dy kateve për shkak të një problemi teknik.
Ne momentin e hapjes se derës, gruaja ishte në gjendje të mirë
shëndetësore edhe pse e çorientuar dhe e dehidratuar nga “burgimi” 8
ditor në kushte aspak të favorshme

Operohet njeriu më i trashë në botë


Britaniku
Paul Mason (48-vjeçar), ish-postier, që tashmë konsiderohet si njeriu
më i trashë në botë – është dërguar me urgjencë në spital për t’iu
nënshtruar një operimi, që do t’ia heqë “tepricën e kilogramëve”, që
seriozisht kërcënojnë jetën e tij.


Mason momentalisht peshon
mbi 440 kg, ndërsa këtë peshë e ka fituar duke ngrenë tetë herë më
shumë ushqim sesa që i nevojitet njeriut të zakonshëm.
Ky operim do të kushtojë disa dhjetëra mijë funte, ndërsa është
vlerësuar se sigurimi shëndetësor i Masonit kushton rreth 100.000 funte
në vit – dhe se shpenzimet për shëndetin e tij kanë kushtuar më shumë
se 1 milion funte në 15 vjetët e kaluara.
Në vitin 2002, zjarrfikësit kishin thyer një mur të shtëpisë së tij,
për ta nxjerrë Masonin jashtë dhe për ta dërguar atë në spital, pasi
ishte e pamundur që ai të dilte nëpërmjet derës. Atëherë ai kishte
humbur 50 kg – por të cilat i ka shtuar me kalimin e kohës.

Emnaku i Jenson Buttonit dhe Lewis Hamiltonit


Çifti
Trevor dhe Mandy Sutton nga Britania e Madhe kanë pagëzuar birin e tyre
me emrat e kampionëve të Formula 1 – Jenson Button dhe Lewis Hamilton,
respektivisht me emrin Jenson Lewis.


Trevor ndjek Formula 1 që 20 vjet, derisa Mandy ka thënë se “nuk është një ndjekëse e madhe e këtij sporti”.
Në një panair të veturave, Button është njoftuar me këtë çift dhe
emnakun e tij Jenson Leëis, të moshës 8-javëshe. “Ishte ndjenjë e
veçantë kur kuptova se fëmija ishte pagëzuar me emrin tim”, ka thënë
Button

Njihuni me Tom dhe Jerryn e vërtetë


Një pamje e
rrallë është regjistruar në qytetin gjerman Siegen – që kujton filmat
vizatimor Tom & Jerry. Në një oborr të mbuluar me borë, macja dhe
miu kanë zhvilluar lojën e tyre.



Maçorri i quajtur Felix,
fillimisht e kishte sulmuar miun kur e kishte parë atë, por është
befasuar keqas kur miu kishte filluar të mbrohej.
Me këmbët e tij të vogla, miu ishte përpjekur të mbrohej nga
maçorri, i cili pa pra e kishte sulmuar atë – dhe mu sikurse në filmat
vizatimor Tom dhe Jerry, miu arriti “të mposhte” maçorrin – dhe ka ikur
në strofullin e tij.

Shfrytëzojnë Hitlerin për të joshur myshterinj


Bosët
e një klubi nate në Poloni janë burgosur, pasi që kanë përdorur
fotografi të Adolf Hitlerit për të promovuar lokalin e tyre.



Pronarët
e barit në Varshavë kishin vendosur fotografi të liderit nazist duke
mbajtur syze me dukje fitimtari, me qëllim që të joshnin vizitorë.
Dhe për këtë arsye ata do të ‘shijojnë’ nga dy vjet burg për
promovimin e fashizmit, gjë e ndaluar rreptësisht në Poloni, vend ky i
okupuar nga trupat gjermane gjatë Luftës së Dytë Botërore.
“Përmbajtja e kësaj fotografe që përdor imazhe për të reklamuar fashizmin është një krim”, tha prokurori Renata Mazur.
Ndërkohë, një përfaqësuese e klubit ka thënë se ideja është se
“Hitleri nuk është i lumtur me gjendjen e klubeve të Varshavës, prandaj
planifikon t’i okupojë ato dhe t’i bëjë më të mirë”.

Gjysmë litër gjak për gjysmë litre birrë


Qendra
për transfuzionin e gjakut në Washington të SHBA-ve u ka ofruar
donatorëve potencialë të gjakut “një marrëveshje të mirë” – për çdo
gjysmë litre të gjakut të dhuruar, ata kanë fituar gjysmë litre birrë.



Qyteti
Tacom ka vendosur t’i joshë donatorët e mundshëm me sloganin – “Dhuroni
gjak, fitoni birrë” – ndërsa kjo fushatë është treguar goxha e
suksesshme. Sipas mediave lokale – çdo donator mbi 21 vjeç, pasi kishte
dhuruar gjak kishte marrë një kupon për gjysmë litre birre.

Restorantet dhe kafiteritë që janë përfshirë në këtë fushatë duhet të
presin së paku katër orë para se t’ia ofrojnë donatorit birrën e
sponsoruar.
Drejtori i kësaj qendre, Dan Schmitt ka thënë se kjo është vetëm një
mënyrë argëtuese e joshjes të donatorëve të gjakut – që është treguar e
suksesshme

Hotelet në trend “Adults-Only”


“Adults-Only” së
fundi janë shndërruar në hotelet më të popullarizuar në mesin e
nudistëve dhe turistëve që pëlqejnë aventurat e rastit. Kushti thuajse
i vetëm për të qenë mysafirë në këto hotele është t’i keni 21 vjet.

Një
hotel i tillë ndodhet në New York, ku nudistët kënaqen duke bërë
“peep-shop”, ndërsa një tjetër hotel i tillë ndodhet edhe në Xhamajkë –
motoja e të cilit është: “Çdo gjë lejohet – por nuk imponohet”.
Në shumicën prej këtyre hoteleve, mysafirët qëndrojnë lakuriqë –
mirëpo një mori sish janë të rezervuar vetëm për çifte, ndërsa
meshkujve të lirë u ndalohet hyrja, ndalim që nuk vlen edhe për femrat
e lira.

Taksisti i ndershëm


Turistja italiane, Felicia
Lettieri (72-vjeçare) do ta mbajë mend sa të është gjallë vozitjen në
taksin e Mukul Asaduzzaman (28-vjeçar) në New York.



Felicia
gjatë festave të fundvitit kishte harruar çantën e saj në taksi, brenda
së cilës ishte edhe portofoli me mbi 20.000 dollarë. Humbjen e çantës
ajo e kishte lajmëruar në polici, e cila i kishte thënë se nuk duhet të
shpresojë shumë në gjetjen e saj.
Taksisti i ri, student i mjekësisë, i lindur në Bangladesh, në taksi
e kishte gjetur çantën e Felicias si dhe adresën e saj - kështu kishte
vendosur të merrte rrugë deri në shtëpinë ku banonte ajo për t’ia
kthyer atë.
Ka vozitur rreth 80 km, nga Long Island deri në Manhattan. Askush
nuk ia kishte hapur derën. Taksisti i ndershëm, e kishte lënë aty
numrin e telefonit, dhe ishte nisur drejt shtëpisë së tij.
Brenda një ore atë e kishte thirrur Felicia e lumtur, ndërsa ai
është kthyer prapa. Siç raportojnë mediat amerikane, ai nuk kishte
pranuar të merrte as shpërblimin e saj.

Japonezët presin Vitin e Ri në ujë të ftohtë


Mu
sikurse që i bëjnë ndryshe shumicën e gjërave nga pjesa tjetër e botës,
japonezët ndryshe e festojnë edhe ardhjen e vitit të ri. Krahas
ritualeve tradicionale, japonezët më guximtarë,bëjnë edhe një gjë
tjetër për nder të ndërrimit të moteve – ata lahen në ujin e ftohtë.



Meshkujt
dhe femrat guximtare japoneze, kanë marrë pjesë në Tokio, në të
ashtuquajturin pastrim të shpirtit – ndërsa shpresojnë që ky ritual do
t’i bëjë më të mençur në vitin vijues.
Kulminacioni i ceremonisë përfundon me larjen në ujin e ftohtë – ku
zakonisht marrin pjesë të rinjtë, derisa personat më të moshuar
qëndrojnë në tempull, ku vazhdojnë t’i kryejnë ritualet fetare.

Cjapi i talentuar nuk e dëshiron famën


Një cjap
i talentuar, i cili di t’i përshëndet njerëzit, ka hequr dorë nga
mundësia për t’u shndërruar në yll. Pronari i këtij cjapi konsideron se
fama do të mund të çrregullonte psikikën e tij.



Producentët
e shout të popullarizuar britanik, Got Talent, ishin përpjekur të
bindnin pronarin e cjapit Darren, që manarin e tij të dërgonte të marrë
pjesë në këtë shou.
Pronari i cjapit ka refuzuar këtë ofertë, pasi që mendon se shfaqja
para kamerave televizive dhe jurisë në përbërje Simon Cowell, Piers
Morgan dhe Amanda Holden do të ishte e dëmshme për shëndetin e cjapit.
Cjapi Darren, 8-vjeçar, është manari i preferuar në fermën White
Post, në Farnsfield (Nottinghamshire), ku i përshëndet të gjithë
vizitorët e kësaj ferme.

Facebook-u bashkon të dënuarin dhe gardianin e Guantanamo-s


Ish-gardiani
i burgut Guantanamo, Brandon Neely, ka vendosur t’i bashkohet rrjetit
shoqëror në internet, Facebook, ku më pas ishte munduar të gjente
kontakt me ish-kolegët e tij të ushtrisë.



Rastësisht, aty ka
gjetur profilin e Shafiq Rasulit, ish të dënuarit në këtë burg, dhe ka
vendosur të vë kontakt më të. Ai i kishte dërguar një porosi Rasulit -
dhe ishte befasuar kishte marrë përgjigje.
Mesazhi fillestar më pas ishte shndërruar në muhabet të gjatë, për
të përfunduar më pastaj edhe me takim sy me sy. Takimin e kishte
aranzhuar Gavin Lee, gazetar i BBC-së, i cili për këtë muhabet kishte
dëgjuar nga Rasul, i cili tash jeton në Britani.
Kompania mediale BBC ia ka paguar Neelyt biletën e aeroplanit drejt
Britanisë së Madhe – në këmbim të mundësisë për të xhiruar takimin mes
Nelely, Rasulit dhe një ish të burgosuri tjetër, të quajtur Ruhal Ahmed.
Fjalët e para të Neelyt drejtuar Rasulit ishin se ai dukej ndryshe
pa kapele, ndërsa Rasul i është përgjigjur se edhe ai duket ndryshe pa
uniformë ushtarake.
Neely u ka premtuar gazetarëve se do t’u rrëfejë për keqtrajtimet që
kanë ngjarë në burgun Guantanamo, ndërsa në mesazhin drejtuar Rasulit,
i ka kërkuar falje për rolin që kishte pasur në këtë burg. /

Kërkimet për thesare, një zbavitje popullore për britanikët


Në
Britani kërkimi për sende metalike është një hobi popullor prej vitesh.
Klube të të apasionuarve pas këtij aktiviteti ekzistojnë në të gjithë
vendin. Vitin e kaluar individët që merren me kërkime të tilla, apo
detektoristët, siç i quajnë britanikët, kanë zbuluar objekte të
rëndësishme si nga ana e vlerës ashtu edhe e rëndësisë arkeologjike.



Roger
Mintit i buzëqeshi fati. Këto janë disa nga 6 mijë monedhat e arta dhe
të argjendta që ka gjetur duke kërkuar për sende metalike në jug-lindje
të Anglisë disa vjet më parë. “Këto monedha janë ar i pastër”, tregon
Mintey.
Ai bëri rreth 250 mijë dollarë nga ky zbulim. Monedhat datojnë nga
shekulli i 13 deri në të 15-in dhe ofrojnë një dritare mbi atë
periudhë. “Këtu shihet një anije dhe mbreti. Një simbol për t’ua
kujtuar të gjithëve, edhe armiqve, se Anglia ishte fuqi e madhe”.
Mintey i zbuloi monedhat në një kantier ndërtimi. Atje tani është
ngritur një shtëpi. Zbulimi, siç e pohon ai vetë, ishte thjesht fat:
“S’do të gjej më kurrë diçka të ngjashme, por kjo nuk më bën ta lë
kërkimin. Nuk jam detektorist për famën, apo për paratë, por sepse më
pëlqen”.
Sot ai ka dalë për kërkim dhe shpreson që pajisja të japë sinjal.
Kur merr sinjal, ai fillon gërmimin, por këtë radhë gjen vetëm metal pa
vlerë. Në Britani ky është një aktivitet popullor me klube entuziastësh
në të gjithë vendin. Ka njerëz që kanë zbuluar objekte me shumë vlerë.
Në Muzeun Britanik të Londrës, Staffordshire Hoard, është koleksioni
më i madh i objekteve të artizanatit anglo-sakson, por njëkohësisht
zbulimi më i madh i bërë ndonjëherë nga një detektorist. Këto objekte u
zbuluan vjet në Stafordshire në Anglinë qendrore. Michael Lewin është
zëvendës drejtori i muzeut për objekte dhe thesare të vogla.
“Ka plot sende ari e argjendi, kryesisht nga objekte lufte, si
këllëfi i shpatës dhe gjëra të tilla, pra është një zbulim fantastik”.
Ekspertët thonë se kur objektet pastrohen dhe analizohen, ata mund
të ndryshojnë plotësisht botëkuptimin tonë për atë periudhë. Këto
objekte anglo-saksone i gjeti Terry Herbert. Ai do të ndajë shpërblimin
prej 5 milionë e 250 mijë dollarësh me të zotin e shtëpisë. “Më ka
sjellë më shumë kënaqësi se të fitoj lotarinë. Gjëra të tilla ka ende
nën tokë. Ndoshta ka edhe objekte më të vlefshme se ato që gjeta unë”.
Pas zbulimit, arkeologët erdhën për të nxjerrë thesarin nga toka,
pasi Herbert njoftoi autoritetet lokale. Lewis i Muzeut Britanik thotë
se shumë zbulime arkeologjike janë bërë nga detektoristët dhe mes tyre
dhe historianëve ekziston një bashkëpunim i mirë.
“Jemi shkëputur nga periudha kur mes detektoristëve dhe arkeologëve
kishte konflikte të shumta dhe jemi tani në periudhën kur përpiqemi të
punojmë së bashku dhe të përdorim aftësitë e detektoristëve më të mirë
të arkeologjisë”.
Ndërkaq, Roger Mintey vazhdon të kërkojë, por ende s’ka gjetur
ndonjë thesar të ri. “Nuk është monedhë romake siç shpresoja, bile nuk
është as monedhë e periudhës së Viktorias”.
Mintey thotë se rreth 60 për qind e objekteve që gjen janë pa vlerë.
Të tjerat mund të jenë metal për t’u shkrirë ose monedha aktuale. Por
ai e bën këtë për tjetër arsye: “Për ekzaltimin, pasi nuk i dihet kurrë
se çfarë zbulon kur dëgjon një sinjal të ri”.
Sinjali mund të paralajmërojë ekzistencën e një thesari. Megjithëse
Mintey pohon se zbulimet e mëdha ndodhin një herë në jetë, ai nuk heq
dorë nga kërkimi. /VOA/