Lopa nga Kosova alarmon Serbinë

nga *lissa* Wed Jan 06, 2010 5:41 am

Një lopë nga Kosova ka arritur të alarmojë shtetin e
Serbisë. Për dy ditë me radhë, mediat serbe kanë raportuar për një
“incident” që ka ngjarë në territorin e Serbisë, në fshatin Rashevac të
Kurshumlisë, fare pranë kufirit me Kosovën. Mirëpo, në vend të sulmit
të supozuar me armë nga ana e Kosovës, tashmë u mor vesh se bëhet fjalë
për një lopë që ka ikur nga territori i Kosovës në territorin e
Serbisë....

Fillimisht, mediat serbe kishin raportuar për të shtëna sporadike
nga territori i Kosovës në drejtim të fshatit Rashevac të Kurshumlisë,
që gjendet fare pranë kufirit me vendin tonë. Më pas është raportuar
edhe për reflektorët që kanë ndriçuar këtë fshat nga territori i
Kosovës – ndërsa dikur edhe për mobilizimin e fshatarëve, të cilët me
armë në krahë ishin përpjekur “të mbronin fshatin e tyre” nga
“ekstremistët shqiptarë”.
Dhe ankthi i shtetit fqinj nuk mbaron me kaq. Ky sulm i supozuar ka
ngjallur edhe reagime të krerët e qytetit të Kurshumlisë, që kishin
dalë në vendin e ngjarjes dhe kishin kërkuar nga banorët e këtij fshati
– shumica pleq – të mos e braktisin fshatin. Gjithashtu ky rast kishte
alarmuar edhe policinë serbe – dhe në fund, madje edhe ministrin e
Mbrojtjes të Serbisë, Dragan Shutanovac – i cili kishte deklaruar se do
të kërkojë nga KFOR-i që bashkërisht të hetojnë këtë “incident”.
Megjithatë, duket se “sirenat e alarmit” do të pushojnë në Serbi,
pasi e përditshmja Politika – e cila thirret në burimet e saj –
raporton se nuk bëhet fjalë për asnjë lloj sulmi, por, për një lopë që
kishte ikur nga Kosova drejt territorit të Serbisë, respektivisht drejt
fshatit Rashevac, që ndodhet në zonën e sigurisë tokësore.