Sejdiu ngushëllon Prevalin dhe Ban Ki-moon-in

nga *lissa* Sun Jan 17, 2010 6:19 am

Presidenti i Republikës së Kosovës, Fatmir Sejdiu, me
rastin e tragjedisë së shkaktuar nga tërmeti i fundit në Republikën e
Haitit u ka dërguar telegrame ngushëllimi, René Garcia Préval,
president i Republikës së Haitit dhe Ban Ki-moonit, sekretar i
përgjithshëm i Kombeve të Bashkuara.

“Në emër të institucioneve dhe popullit të Republikës së Kosovës,
jua shpreh Juve, Shkëlqesia e Juaj, dhe mbarë popullit të Haitit,
ngushëllimet tona më të thella për jetët e humbura dhe dëmet që janë
shkaktuar nga tërmeti i fundit”, thuhet në telegramin e presidentit
Sejdiu dërguar presidentit Preval.
“Lajmi për këtë tragjedi e ka prekur në shpirt dhe në mendje mbarë
popullin tim, prandaj, i nderuari Kryetar Préval, ju lus t’i pranoni
ngushëllimet tona më të sinqerta. Në këtë momente të vështira për
vendin tuaj, ne jua ofrojmë miqësinë dhe solidaritetin e popullit të
Kosovës. Në këtë momente të dhimbjes, ne lutemi për të gjithë ata që
kanë humbur jetën dhe që kanë pësuar si rrjedhojë e kësaj fatkeqësie
natyrore”, theksohet më tej në telegram.

Ndërkaq, në telegramin dërguar sekretarit Ban, Sejdiu e ngushëllon atë
dhe të gjitha vendet anëtare të Kombeve të Bashkuara, në emër të
institucioneve dhe popullit të Republikës së Kosovës, për pjesëtarët e
personelit të OKB-së që ka humbur jetën si rrjedhojë e tërmetit të
fundit në Republikën e Haitit.