Kuvendi i Kosovës bëhet me tre deputetë të rinj

nga *lissa* Sat Jan 23, 2010 6:44 am

Bujar Dugolli nuk është më anëtar i AAK-së, por kjo nuk
prish punë që ai si anëtar i listës së AAK-së nga viti 2007 të hyjë në
Kuvendin e Kosovës. Komisioni Qendror Zgjedhor e ka kryer punën siç e
parasheh ligji kështu që Bujar Dugolli, Lutfi Zharku dhe Petar Miletiq
të mund të ushtrojnë detyrën e deputetit në Kuvendin e Kosovës.

Të premten, Komisioni Qendror Zgjedhor me njëmbëdhjetë vota pro e ka
miratuar rekomandimin e ardhur nga Zyra Ligjore e këtij organizmi të
adresuar te presidenti i Kosovës për zëvendësimin e deputetëve të
Kuvendit të Kosovës, si pasojë e rrethanave të krijuara pas zgjedhjeve
lokale të mbajtura në nëntor të vitit të kaluar - 2009.
Ligji për zgjedhjet në Kosovë thotë se në rast se ndonjë nga
deputetët aktualë lirojnë ulësen për çfarëdo arsye, atëherë është
kryetari i Kuvendit të Kosovës ai i cili duhet ta iniciojë procedurën e
zëvendësimit me anë të një shkrese dërguar presidentit të Kosovës.
Më pas, presidenti e njofton KQZ-në për situatën dhe kërkon nga
KQZ-ja ta shikojë listën e kandidatëve për ta certifikuar deputetin e
ri. Pasi presidenti e merr njoftimin nga KQZ-, ai menjëherë e informon
kryetarin e Kuvendit për vendimin e KQZ-së.
“Komisioni Qendror Zgjedhor i rekomandon presidentit të Kosovës që
Bujar Dugolli nga AAK-ja ta zëvendësojë Rasim Selmanajn, i zgjedhur
kryetar komune në Deçan, Petar Miletiq nga PLPS ta zëvendësojë Bojan
Stojanoviqin, i zgjedhur kryetar komune në Graçanicë dhe Lutfi Zharku
nga LDK ta zëvendësojë Agim Veliun, i zgjedhur kryetar komune në
Podujevë”, ka kumtuar udhëzimin e KQZ-së Alban Muriqi.
Që të tre deputetët e rinj: Bujar Dugolli, Lutfi Zharku dhe Petar
Miletiq, kishin mbetur të parët në “listat e pritjes” së partive të
tyre, për t’u futur në Kuvendin e Kosovës pas zgjedhjeve parlamentare
të vitit 2007. /Koha/