Pjesëmarrje e ulët në votime

nga *lissa* Sun Jan 31, 2010 7:26 am

Komisioni Qendror i Zgjedhjeve thotë se pjesëmarrja e
votuesve në raundin e tretë të zgjedhjeve në Prizren dhe në Lipjan
është e ulët.

Deri pak para mesditës, sipas të dhënave të prezantuara nga organi i
zgjedhjeve, në Prizren kanë votuar më pak se 8 për qind e qytetarëve,
ndërsa në Lipjan pjesëmarrja ka qenë më e lartë duke shkuar në mbi 12
për qind.
Zgjedhjet në këto dy komuna të Kosovës po mbahen për të tretën herë
me radhë brenda një harku kohor prej tre muajsh.

KQZ : Procesi zgjedhor po ecën pa probleme
Komisioni Qendror Zgjedhor, në konferencën për media, bëri të ditur
se me përjashtim të dy qendrave të votimit në Prizren, të gjitha
qendrat e tjera në këtë komunë dhe atë të Lipjanit janë hapur me kohë
dhe se procesi zgjedhor po ecën pa probleme.
Kryetarja e KQZ-së, Nesrin Lushta, ka thënë se në Prizren janë hapur
60 qendra të votimit, kurse në Lipjan 26. Ajo, gjithashtu ka thënë se
procesi i votimit po zhvillohet pa probleme.
“Sipas informatave, të cilat i kemi pranuar nga Komisionet Komunale
të këtyre dy komunave, të gjitha vendvotimet janë hapur, përveç dy
vendvotimeve në komunën e Prizrenit, në Novak dhe Sreçkë, të banuar nga
komuniteti serb, ku votuesit do të kenë mundësi të shërbehen nga ekipet
mobile”, ka thënë Lushta.
Procesin zgjedhor do ta vëzhgojnë 2.811 vëzhgues vendorë dhe
ndërkombëtarë, ndërsa Policia e Kosovës ka angazhuar 800 zyrtarë
policorë, të cilët do të kujdesen për mbarëvajtjen e duhur të procesit
të votimit.