Nimani, shpresa më e madhe olimpike e Gjermanisë

nga Mc-LiNdY Thu Apr 08, 2010 4:52 am

Prishtinë, 8 prill - Boksierja kosovare, Azize Nimani, është shpresa më e madhe e Gjermanisë për të fituar një medalje olimpike në boksin e femrave në "Londër 2012". Boksi i femrave për herë të parë do të debutojë në programin e Lojërat Olimpike në "Londër 2012". Në këtë Olimpiadë do të jenë tri kategori të femrave - kategoria mizë (48-51 kg), kategoria e lehtë (56-60 kg) dhe kategoria e mesme (69-75 kg).
Nimani 18-vjeçare vlerësohet nga të gjithë ekspertët si talente e madhe dhe boksierja më e mirë në Gjermani. Ajo synon një medalje në kategorinë mizë.
"Në thasët e boksit në palestrën në Berlin nuk godet një djalosh i vogël, por ndoshta medalistja e parë olimpike në histori të boksit gjerman: 18-vjeçarja Azize Nimani. Ndërsa atë e stërvit Torsten Schmitz", shkruan revista gjermane "Box Sport".
Nimani ka tri vite që merret me boks. Ajo dy herë ka qenë kampione e Gjermanisë për juniore, ndërsa vitin e kaluar fitoi edhe një turne ndërkombëtar në Kazakistan.
"Vlerësohem si boksierja më e mirë amatore në Gjermani dhe të gjithë presin nga unë që të fitojë medalje në 'Londër 2012'. Nëse ecin gjërat sipas parashikimeve, atëherë e kam të sigurt pjesëmarrjen në Londër, në kategorinë deri 51 kilogramë dhe po ashtu kam gjasa të mira për të fituar një medalje. Jam duke u përgatitur shumë që pas dy viteve të jem në formën më të mirë të mundshme", ka thënë Nimani të mërkurën për gazetën.
Nimani është duke u stërvitur nga ish-trajneri i boksierët më të famshëm shqiptar, Luan Krasniqi, Torsten Schmitz. Stërvitjet me Schmitzin, boksierja nga Mitrovica i vlerëson lart.
"Stërvitem dy herë në ditë nga trajneri Schmitz. Nga ai kam mësuar shumë. Është trajneri më i mirë që kam pasur deri tash. Jam shumë e kënaqur me përparimin që kam bërë dhe madje jam edhe vetë e befasuar se si më kanë ecur gjërat", ka thënë Nimani.
Nimani më herët pati qenë futbolliste dhe luante për skuadrën e Bundesliga 2 të Gjermanisë, Arminia Bielefeld. Nimani sivjet pritet të marrë pjesë për herë të parë në garat për seniore.
"Unë këtë vit do të përfaqësoi Gjermaninë në Kampionatin Botëror që do të mbahet në Meksikë. Po ashtu për herë të parë do të paraqitem në kampionatin e Gjermanisë për seniore. Unë e kam mposhtur më herët kampionen e Gjermanisë dhe pres që këtë vit të fitojë medaljen e artë në kampionatin gjerman", ka thënë Nimani.
Nimani mund të mos jetë boksierja e vetme kosovare në Olimpiadën Verore "Londër 2012". Po ashtu pritet të marrë pjesë edhe Kosovare Buzuku, që është reprezentuese e Suedisë. Ajo lufton në kategorinë deri në 64 kilogramë.