Zgjedhjet, mesazh pozitiv për ndërtimin e shtetit demokratik

nga *lissa* Fri Dec 18, 2009 10:22 am

Kryeministri Hashim Thaçi ka pritur të premten
sekretarin e përgjithshëm të OSBE-së, Marc-Perrin de Brichambaut, me të
cilin ka biseduar për rrjedhat e përgjithshme demokratike në vend, me
theks të veçantë për zgjedhjet e fundit lokale.

Kryeministri Thaçi – siç thuhet në një komunikatë të Kryeministrisë –
“me këtë rast e njoftoi sekretarin e përgjithshëm të OSBE-së, për
ecurinë demokratike, të rregullt dhe të respektimit të standardeve më
të larta evropiane në organizimin dhe mbarëvajtjen e zgjedhjeve lokale”

Thaçi pjesëmarrjen e të gjitha komuniteteve në zgjedhjet e fundit e
vlerësoi mesazh shumë pozitiv për ndërtimin e shtetit demokratik, me
institucione gjithëpërfshirëse dhe stabile. Në të njëjtën kohë, ai ka
vlerësuar profesionale, të paanshme dhe efektive punën e Komisionit
Qendror të Zgjedhjeve.

Kryeministri Thaçi dhe sekretari i përgjithshëm i OSBE-së, de
Brichambaut, në takimin e kanë diskutuar edhe lidhur me arsimin dhe
pakicat. Në këtë drejtim, Thaçi premtoi angazhimin e vazhdueshëm të
qeverisë.

Ai njoftoi përfaqësuesin e lartë të OSBE-së edhe për punën e Qeverisë
së Republikës së Kosovës, në veçanti të Zyrës së Komuniteteve, që
funksionon në kuadër të Zyrës së Kryeministrit, në funksion të
integrimit të të gjitha komuniteteve në institucionet dhe në shoqërinë
kosovare.

Në takim, kryeministri Thaçi shprehu falënderime dhe mirënjohje për
punën e OSBE-në në Kosovë dhe shprehu gatishmërinë e qeverisë për
bashkëpunim të mëtejshëm në fusha të ndryshme.