Rivotime në Prizren, Gjilan e Lipjan?

nga *lissa* Sat Dec 19, 2009 8:26 am

Komisioni Zgjedhor për Ankesa dhe Parashtresa (KZAP), në
seancën e mbajtur të shtunën, ka marrë vendim të udhëzojë Komisionin
Qendror Zgjedhor (KQZ) që të urdhërojë përsëritjen e votimit në komunën
e Prizrenit, Gjilanit, dhe Lipjanit, ku janë shënuar
parregullsi në
rrethin e dytë të zgjedhjeve për kryetar komunash.

Paneli i KZAP-it, i përbërë nga Osman Tmava, kryesues, Ymer Hoxha
dhe Muharrem Shala, duke vendosur në lidhje me ankesat e parashtruara
për parregullsitë në procesin e votimit për rrethin e dytë për
zgjedhjen e kryetarëve të komunave të Prizrenit, Gjilanit dhe Lipjanit,
mori vendim që të pranohen ankesat e subjekteve politike.

Kryetari i KZAP-it, Tahir Rrecaj, ka thënë se arsyet pse kanë marrë një
vendim të tillë është sepse në bazë të fakteve të prezantuara nga palët
ankuese, si dhe nga hetimet që janë kryer nga ana e komisionit janë
konstatuar një varg parregullsish, dhe se mund të ketë pasur mashtrime,
falsifikime dhe gabime, të cilat e bëjnë procesin zgjedhor për këto tri
komuna jo të vlefshëm.

“Komisioni Zgjedhor për Ankesa dhe Parashtresa para disa minutash ka
marr një vendim me të cilin ka shqyrtuar 43 ankesa në bazë të
rregullave dhe procedurave të KZAP-it, ne kemi mundësi që ankesat ku
kanë të bëjnë me çështje të njëjta ose të ngjashme mund të shqyrtohen
njëkohësisht dhe të merret një vendim ashtu që për 43 ankesat të cilat
kanë të bëjnë kryesisht me komunën e Prizrenit, Gjilanit dhe Lipjanit,
ne kemi vendos një vendim. Komisioni i ka pranuar këto ankesa dhe në
bazë të ligjit mbi zgjedhjet e përgjithshme dhe zgjedhjet lokale në
Kosovë, ka udhëzuar Komisionin Qendror Zgjedhor, të urdhërojë
përsëritjen e votimit në komunën e Prizrenit, Gjilanit, dhe të
Lipjanit”, ka thënë Rrecaj, transmeton KosovaPress.
Sipas rezultateve preliminare të KQZ-së në komunën e Prizrenit
kandidati i PDK-së Ramadan Muja dhe ai i LDK-së Hanefi Muharremi kanë
përqindje të barabartë të votave 50:50, derisa në Lipjan dhe Gjilan, po
sipas rezultateve preliminare, kanë fituar kandidatët e PDK-së Shukri
Buja, përkatësisht Qemajl Mustafa.

Komisioni Qendror Zgjedhor, gjatë ditës do të mbajë një mbledhje, ku
pritet të diskutohet rreth numërimit të votave me kusht për komunën e
Prizrenit.