ICO dhe EULEX nuk i njohin strukturat paralele

nga *lissa* Thu Jan 07, 2010 9:23 am

Autoritetet ndërkombëtare në Kosovë nuk i njohin fare,
madje i quajnë të papranueshme strukturat paralele serbe në Kosovë,
apo, siç thuhet, strukturat që kanë për qëllim t’i minojnë
institucionet e Republikës së Kosovës. Megjithatë, përfaqësues të
mekanizmave ndërkombëtarë theksojnë se forca nuk është mjet që mund të
zgjidhë këtë problem.

Zëdhënësi i Zyrës Civile Ndërkombëtare në Kosovë, Andy McGuffie, jep
vlerësimin e institucionit që ai përfaqëson në lidhje me këtë temë:
“Kosova ka një sistem legjitim gjyqësor, sikurse që ka struktura
legjitime në fusha të tjera të qeverisjes. Ne mendojmë se veprimet, të
cilat janë destruktive dhe të dizajnuara për t’i minuar strukturat
legjitime të Kosovës, përfshirë ato të gjyqësorit, janë të
papranueshme”, ka thënë për Radion Evropa e Lirë.
Qëndrimit të ICO-së i bashkëngjitet edhe misioni i Bashkimit
Evropian për forcimin e sundimit të ligjit. Zëdhënësi i EULEX-it,
Christophe.Lamfalussy, thekson se në asnjë vend në Bashkimin Evropian
nuk ka dy sisteme gjyqësore që veprojnë në të njëjtën kohë e në të
njëjtin vend. EULEX-i, thotë ai, ka për mision t’i asistojë vetëm
institucionet e Kosovës në fushën e sundimit të ligjit.
“EULEX-i nuk i njeh të ashtuquajturat struktura paralele serbe.
Mandati ynë është i qartë dhe derivon nga Plani i përbashkët i veprimit
i 27 vendeve anëtare të BE-së, sipas të cilit ne jemi këtu për t’i
asistuar institucionet e Kosovës në fushën e sundimit të ligjit”, thotë
Lamfalusi, duke përjashtuar mundësinë e përdorimit të forcës në këtë
drejtim. “Ne besojmë se dialogu është rruga më e mirë përpara dhe jo
përdorimi i forcës”, thekson ai.