Thaçi: Riformatimi i Qeverisë ka filluar

Thaçi: Riformatimi i Qeverisë ka filluar
“Riformatizimi i Qeverisë ka filluar nga dorëheqja ime si deputet në Kuvendin e Republikës së Kosovës dhe do të vazhdojë me hapa gradualë, të kujdesshëm, të matur dhe efektivë”, ka thënë kryeministri Hashim Thaçi në një intervistë për radion Evropa e Lirë.
Ky riformatizim, apo rifreskim, ndodh, sipas kryeministrit, me integrimin e njerëzve nga kategori të caktuar të shoqërisë çdo ditë në institucionet dhe Qeverinë e Kosovës. “Ndërsa, angazhime konkrete pres në javët e ardhshme”, tha ai.

“Ne kemi një bashkëpunim të shkëlqyeshëm me partnerin e koalicionit, mund të ketë zëra të ndryshëm jo-ndikues në këtë çështje. Prandaj, koalicioni ka efektivitet në punë, ka angazhime të përbashkëta shtet-ndërtuese, por edhe të përgjegjësive pushtetare”, ka thënë ai.

Kryeministri Thaçi ka shtuar se, ky koalicion është bërë për interesa të shtetit, po edhe për ndarjen e përgjegjësive të pushtetit. “Është një bashkëpunim i mirë, efektiv i suksesit të koalicionit, të shtetit tonë”, ka vlerësuar ai.

“Ndërsa, duhet kuptuar dhe ndarë fushatat elektorale në nivel lokal nga funksionimi efektiv i institucioneve në nivel qendror. Pra, institucionet kanë mandat të plotë, zgjedhjet do të organizohen në vitin e ardhshëm në kohë të rregullt, në afatin e rregullt kushtetues”, ka thënë Thaçi.